Europa S.A. Pequena guía crítica da Unión Europea. Preparada pola Comisión Internacional de ATTAC-Catalunya. Edición e distribución propia. Barcelona, abril 2002. Esta pequena guía proporciona unha información analítica e documentada sobre a UE, como funciona e as políticas que desenvolve, explicando o que non se menciona nas versións oficiais acerca da UE, respondendo a moitos porqués escuros e os intereses que se agachan detrás. Analiza as consecuencias destas políticas desde unha posición crítica contra a globalización neoliberal e plantexa as alternativas que propoñen ATTAC e os movimentos que coma el loitan por outra Europa e outro mundo. ¿Sabías que o 60% das leis que se aproban en España son aplicacións de acordos europeos? ¿Sabías que as etapas máis importantes da UE son dictadas polos lobbies das empresas transnacionais europeas ou norteamericanas?

Jaque a la globalización. Pepa Roma. Círculo de Lectores Eran moitas as persoas ben pensantes, na sua maioría habitantes dos países desenvolvidos, que chegaran a crer no proceso ao que hoxe chamamos "globalización": unha alternativa positiva que forxaba novas ferramentas coas que facer un mundo mellor e mais xusto. Pero a realidade que vive grande parte da humanidade é moi distinta, agacha-se tras as imaxes dos noticiarios de televisión ou intuimo-la ás veces ao ler entre liñas os breves de algúns periódicos. A máscara há-se desprendido e deixou ao descubrido que o único fin que guía e alimenta as leis do libre comercio é o benefício económico puro e simple, e canto mais rápido, mellor. E non só aumenta a miseria no Terceiro Mundo, se non que tamén en Occidente se instala de forma crecente e preocupante a pobreza e a precariedade. Entre algúns intelectuais e políticos chegou a planear un certo descontento que se manifestaba nunha inerme apatía ante o que semellaba o infranqueable muro dun caleixón sen saída. A evidencia desa desazón, as ideas renovadoras tiñan que partir de outros sitios. En Seattle atoparon-se persoas de distintos lugares do planeta, xente de todas as razas e credos que compartían o mesmo descontento e indignación. Milleiros de cidadáns conseguiran atopar-se e organizar-se , homes e mulleres, ata entón seres anónimos, que teceran unha rede tan sutil que pasara inadvertida, e a través da cal trocaban-se a información que a penas aparecía nos grandes medios. Todos unidos para abanderar a resistencia contra este novo capitalismo despiadado que medra sen descanso. Seattle foi o lugar de encontro de milleiros de persoas que souberan construir a utopía necesaria para botar o seu descontento á cara do mercantilismo mais cruel. Pero en realidade, foi tan só a primeira das palabras que pronunciara unha alternativa cidadana desexosa de loitar contra a inxustiza do poderoso, sexa cal sexa o nome tras o que se escuda e sen importar en o que recuncho do planeta exerce o seu dominio ou o seu terror.

O mercado e a globalización. José Luís Sampedro. Editorial Destino "Coa queda do muro de Berlín e o derrube soviético desapareceu o único grande rival oposto á expansión do capitalismo, que, desde entón, ten intensificado coa nova tecnoloxía informática o seu dominio sobre os mercados mundiais, organizando unha rede especulativa e financeira non controlada polos gobernos, en virtude de medidas liberalizadoras. Os ideólogos e beneficiarios do sistema afirman que esa rede, coñecida como Globalización, conducirá á riqueza para todos e, ademais, é consecuencia inevitábel do progreso técnico. Son certas estas afirmacións ou son teorías elaboradas para xustificar o acaparamento de poder e riqueza conseguido ao dominar as transaccións mundiais? O feito é que fronte a esta filosofía de mercado sen controlo alzan-se numerosos obxectores para lembrar que cada ano é meirande a foxa entre os países ricos e os pobres, referindo-se ademais a problemas planetarios (como o medio ambiente, as epidemias, o xenocidio, o terrorismo) que só se resolverán globalizando todo o importante para a existencia humana e non apenas a rendibilidade económica. Deste modo, un outro mundo é posíbel. Como sería ese mundo? Cais son as consecuencias desta globalización para pobres e ricos? Como lograr que o poder político dos gobernos democráticos volte a controlar hoxe o supremo poder económico transnacional? Alcanzará-se un outro mundo máis racional e equitativo? José Luís Sampedro, catedrático de Estructura Económica, desvenda a economía de mercado diante dos ollos de calquer leitor para permitir-lle afrontar esas cuestións. Con eficacia narrativa, mais tamén coa rigorosa claridade acreditada nas súas obras anteriores, o profesor Sampedro amosa-se convecido de que non vivemos o fin da historia -como cre certo pensamento liberal-, mais, polo contrario, a súa permanente evolución e cambio. Por isto cabe anunciar serenamente que un outro mundo é seguro. Pois como cantou o poeta: "Non é cara abaixo, nen cara atrás, a Vida".

Nologo. El poder de las marcas. Naomi Kleins.Toronto, 2000. Paidós Ibérica, 2001 Este libro é unha especie de polaroid escrita tomada no noso planeta durante os anos 1998-99, co obxecto de expor coa maior claridade posible, o que significou para os dereitos laborais dos traballadores de todo o planeta e a economía dos países en vías de desenvolvimento o actual modelo de liberalización económica mundial (a denominada "globalización"). Recollendo testemuños directos e estadísticas, a cada cal mais dolorosa que a anterior, (semella inevitable que a munición para a batalla ideolóxica que libramos a proporcionen esas interminables series de dados que trazan con nitidez o panorama escalofriante dun mundo que se move entre o absurdo da hiperriqueza e a dor infinita da pobreza extrema), podemos facer-nos unha composición de lugar a partir de feitos en apariencia insignificantes que afectan ao noso modo de vida de maneira directa. Agora que o estatus de cidadán evolucionou ata o de consumidor, este libro expón con crudeza quen están a pagar o parrulo desta transformación. A asociación entre a avidez das grandes compañías trasnacionais e a apatía e o desentendimento do consumidor ocidental ten consecuencias gravísimas que nos chegan como ecos lonxanos e apagados doutro mundo imposible. Ben, chegou o momento de espertar dunha vez e comezar a plantearse seriemente se debemos seguir sometidos a todas esas marcas que satisfacen os nosos desexos e as contas de resultados dos seus accionistas a costa da miseria e a explotación de millóns de traballadores (¿novos escravos?).Non logo: benvidos ao mundo real

Pongamos la OMC en su sitio. Susan George. Editorial Icaria. Febreiro 2002. Se a ambición dirixente da OMC sobre o comercio internacional non coñece límites nin barreiras -"o comercio éun valor por riba de toda consideración"- as consecuencias das súas decisións, especialmente nos países emerxentes e nos países do mal chamado terceiro mundo, solen ser desastrosas. I esto é así debido especialmente a que a OMC -ó igual que o FMI e o BM- tanto no seu funcionamento como na súa ideoloxía non busca unha regulamentación xusta do comercio entre países que, entre outras cousas, sexa quen de impedir que reine a lei da selva e beneficie a todos senón que procura o favorecemento dos intereses das firmas transnacionais supoñendo graves prexuízos e perigos tanto para a cidadanía mundial como para o funcionamento democrático dos países. O empeño de desenmascara-lo funcionamento actual da OCM e a descubri-los efectos -e as causas- das súas actuacións e diríxese este traballo que, como todos os desta muller, agocha un sobresaliente rigor científico.

La bolsa o la vida. Las finanzas contra las pueblos. Eric Toussaint. Editorial Gakoa. Xaneiro 2002. Para resumi-los contidos principais deste traballo nada mellor que recolle-la referencia que na contraportada fai Bernard Cassen -presidente de ATTAC- do mesmo. Neste traballo o autor proponnos "todo o que hai que saber sobre a mundialización, a ofensiva neoliberal e a crise da débeda do Sur. Referencias históricas, recadros documentais, léxico e bibliografía completan unha exposición a vez rigorosa e pedagóxica sobre as políticas desenvolvidas en nome da ideoloxía hexemónica. As explicacións consagradas a mundialización financeira e o Fondo Monetario Internacional son particularmente esclarecedoras, especialmente no conxunto da actual crise sistémica". Velaí, as razóns que nos levan a recomenda-la lectura diste traballo que ven, sen dúbidas, a enriquece-lo bagaxe teórico e instrumental do movemento democrático internacional.

Informe LUGANO. Susan George. Editorial Icaria. Febreiro 2001. A vicepresidenta de ATTAC xunto a un amplo grupo de expertos levaron a cabo a elaboración dun traballo teórico de grande rigor e fondura no que se ofrece un "un dos diagnósticos mais reveladores das condicións obxectivas e subxectivas da situación actual do capitalismo -a globalización- e das súas perspectivas do futuro" de tal xeito que permite visualizar tanto as condicións actuais en que se desenvolve a economía capitalista mundial, como as consecuencias de este desenvolvemento nos planos económico, social e ecolóxico. Notabilísimo traballo de análise que supón de seu "un informe abraiante, documentado, apaixonado e apaixonante, que consigue ..... desarma-los mecanismos fundamentalmente perversos do capitalismo ultraliberal..."

ATTAC contra a ditadura dos mercados. Bernard Cassen e outros. Edicións Laiovento. Xaneiro 2001. Este volume recolle, quizás mellor que ningún outro, algunhas das teses centrais que defende a organización ATTAC, abranguendo traballos que van desde a descripción das características actuais -e as súas manifestacións críticas- da chamada globalización e os seus efectos mais perniciosos sobre as sociedades e economías nacionais -a crise mexicana, a do sueste asiático, a grave situación polo que atravesaron Rusia e o Xapón, China..... a actual situación arxentina....- ata un avanzado traballo de desenvolvemento operativo -e enriquecemento- das teses tradicionais de Mr. Tobin encol dunha taxa sobre as transaccións financeiras -a taxa Tobin- que demostran a posibilidade de aplicación práctica en espacios económicos como o da Unión Europea, así como traballos sobre a infernal espiral da débeda externa e os seus efectos demoledores nos países do chamado terceiro mundo. Traballos todos eles que dado o seu rigor e elevado nivel científico supoñen unha referencia obrigada para calquera persoa interesada pola realidade actual.